「#香港文學季」開幕!

14641925_1151027381629851_8346089655127514258_n

由「香港文學生活館」主辦的「香港文學季」開鑼,朱凱廸被邀請作開幕嘉賓之一,與作家吳煦斌、鄧小樺、陳清僑、許曉暉與梁以文一起主持開幕禮。接下來亦有自然書寫作家劉克襄和作家兼教授羅貴祥演講。

一群香港本土作家及學者自2009年開始倡議香港要有文學館,他們一直致力舉辦各種文藝活動。希望文學館未來的工作順利,讓更多人認識及熱愛文學。

講稿:

香港文學館的朋友,陳清僑教授,小樺,許曉暉副局長,各位巿民和朋友,今日好榮幸來到香港文學季的開幕禮。我出席公開場合,多數係因為唔開心既事,去抗議、去示威、去警局,今日可以來到一個開心而寧靜的場合,見到「香港文學季.文學好自然」呢幾個字,真係百感交集。古人有一句詩,「此身猶在堪驚」,自然的美好,真係百般滋味。

響我地的時代,我感覺到,自然已經係好弱小,好似一個沉默的人,成日被人恰。例如大家都知,我之前盡力狂chur的橫洲事件,就係講緊,有兩種土地,一個係已被棄置同被污染的棕地,一個係綠化帶,明明應該保護綠化,但係如果涉及一d人既利益,綠化、自然呢d野,就會被犧牲。自然孕育左人類,但自然亦係被人為破壞的。好多parties,官、商、鄉、黑,圍住沉默的自然,睇下可以點樣響自然身上切一塊肉落黎,賺錢。自然係唔識講野架,我覺得,作為生於呢個時代的人,我地有保護自然的責任。

十年前,本來我響皇后碼頭、時代廣場等都巿核心,搞保育運動同公共空間運動,後來就入左新界,關注菜園村迫遷,新界東北發展等等鄉郊空間運動。我響鄉郊有左自己既家。在自然的環境,人同外界係相通既,人只須要開放自己去感受周圍,而不需要建立一個假面具去掩飾自己。中國人講,天地化育,就係呢個意思。如果可以,我都希望我個女不遷,可以在一個比較接近自然的環境長大。

今日在座有作家吳煦斌,稍後文學季會向佢致敬,頒個獎俾佢。吳女士在今日的星期日明報話,孩子的心中「充滿純樸的尊重和驚訝,還沒有既定的觀念。他們或會害怕,但沒有嚴厲的抗拒,他們會接受自然運行的規律而感到安心,世界對他們仍是美麗的,可以信任的丶觸摸的丶親近的」。我都好想,我地可以帶俾下一代,一個可以信任、可以親近的美麗世界。同埋,吳煦斌女士的小說中,父親的形象總是沉默、高大、神秘,個袋永遠可以掏出神秘新鮮的事物來,而作為一個父親,真係覺得要多D鼓勵我個女讀吳煦斌!等佢想像個老豆可以好有型!

我同文學其實有遙遠而親密的關係,我大學係讀英文系的,在座的陳清僑教授,我以前在你的MODERN FICTION堂上訓過覺,真係唔好意思。我同小樺第一次見,係2005年一個反世貿的詩歌音樂會,響旺角金輪大廈天台。雖然我從事政策和社會運動,但文學對我一直有很重要的啟發。因為社會的特別環境,香港文學的發展,同香港政治的發展一樣,都係面對好多制肘的,但我一直覺得,我地係唔可以認輸!我係好支持香港要有文學館的。文學係講求創造的,文學家藝術家的責任,就係要創造自己的世界。我覺得面對香港社會,無論係政治、環境保護,定係文學藝術,我地,包括我呢個中年人,都必須負起創造的責任!我地要創造自己的命運!文學季加油,文學館加油!多謝大家!

*香港文學季︰文學好自然 — 香港文學館
http://www.hkliteraturehouse.org/literature2016/

香港文學生活館

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s